Bu gün Mərkəzi Seçki Komissiyasının (MSK) növbəti iclası keçirilib. АPA-nın məlumatına görə, iclasda noyabrın 1-də Milli Məclisə keçiriləcək seçkilərdə səsvermə prosesində seçki məntəqələrində “veb-kamera”lardan istifadə məsələsində baxılıb. MSK sədrinin müavini Natiq Məmmədov bildirib ki, müşahidəçilərin seçki prosesinə cəlb edilməsi prosesi olduqca önəmlidir. 2008-ci ildə Azərbaycanda ilk dəfə “veb-kamera”lardan istifadə edildiyini deyən N. Məmmədov deyib ki, “veb-kamera”lardan istifadə olduqca mühümdür və bu il də bu təcrübənin tətbiqi davam etdirilməlidir:

“Bu il də 119 seçki dairəsinin 1000 seçki məntəqəsində kameralar quraşdırmağa nail olacağıq. Səsvermə kabinələri istisna olmaqla, bütün proseslər bu kameralar vasitəsilə izləniləcək. Seçki prosesi başlayandan sona kimi seçkiləri izləmək mümkün olacaq. Təklif olunur ki, qərarın icrası aidiyyatı qurumlara həvalə edilsin”… Davamı →

“Seçki bülletenlərinin çapı artıq başa çatıb”. APA-nın məlumatına görə, bunu bu gün Mərkəzi Seçki Komissiyasının İnformasiya Mərkəzində keçirilən mətbuat konfransında MSK sədri Məzahir Pənahov deyib. M. Pənahov bildirib ki, seçki bülletenlərinin dairələrə paylanmasına sabahdan başlanılacaq.

MSK sədri bülletenlərin ilkin olaraq Naxçıvandakı seçki dairələrinə, sonra isə Azərbaycanın digər ucqar regionlarındakı dairələrə, nəhayət ən sonda Sumqayıt, Abşeron və Bakıdakı dairələrə paylanacağını bildirib.

MSK sədri parlamentə seçkilərlə bağlı təşviqatın zəif aparılması ilə bağlı fikirlərin yanlış olduğunu qeyd edib: “Əvvəlki seçkilərlə müqayisədə indi təşviqat daha çox sosial şəbəkələrdə aparılır, bunu nəzərə almaq lazımdır”.

Milli Məclisə noyabrın 1-ə təyin edilmiş parlament seçkilərində 769 deputatlığa namizəd mübarizə aparacaq. APA-nın məlumatına görə, deputatlığa namizədlərin siyahısı Mərkəzi Seçki Komissiyasının saytında verilib. Beləliklə, Milli Məclisdə 125 yer uğrunda 769 nəfər, başqa sözlə, 1 yer uğrunda 6 nəfər mübarizə aparacaq.

Xatırladaq ki, Milli Məclisə seçkilərdə 1246 nəfərin deputatlığa namizədliyi qeydə alınıb, 477 nəfər namizədliyini geri götürüb.

Qeyd edək ki, Mərkəzi Seçki Komissiyasının qərarı ilə müvafiq poliqrafiya müəssisəsi tərəfindən seçki bülletenlərinin hazırlanması səsvermə gününə ən azı 10 gün qalmış başa çatmalıdır. Milli Məclisə seçkilərlə əlaqədar bu proses sabah – oktyabrın 22-də başa çatır.

Bu gün Mərkəzi Seçki Komissiyasının (MSK) növbəti iclasında Milli Məclisə seçkilərdə “exit-poll” keçirmək istəyən qurumların müraciətinə baxılıb və digər iki təşkilatla yanaşı “ELS” Müstəqil Araşdırmalar Mərkəzi akkreditasiyadan keçib. MSK sədrinin müavini Natiq Məmmədov Azərbaycan seçki təcrübəsində “exit-poll” tədqiqatının artıq reallığa çevrildiyini və ölkədə bu sahədə ixtisaslaşmış qurumların  fəaliyyət göstərdiyini deyib.

O, “ELS” Müstəqil Araşdırmalar Mərkəzinin indiyə qədər “exit-poll” tədqiqatları və çox saylı sorğular keçirdiyini də dilə gətirib. “Müstəqil Araşdırmalar Mərkəzinin təqdim etdiyi sənədlər əsaslı olduğundan təklif edirəm ki, bu qurum “exit-poll” aparan təşkilat kimi qeydiyyata alınsın”. Təklif səsə qoyularaq qəbul edilib.
Qeyd edək ki, “ELS” Müstəqil Araşdırmalar mərkəzi “Ekzit-poll” tədqiqatını noyabrın 1-nə təyin olunmuş Parlament seçkiləri zamanı Azərbaycanın 118 dairəsi üzrə 1180 seçki məntəqəsində həyata keçırməyi planlaşdırır.

Sabah Azərbaycanın bütün ərazisində müşahidə aparılmasına dair ərizələrin Mərkəzi Seçki Komissiyasına (MSK) təqdim edilməsi və MSK-nın “exit-poll” keçirmək üçün müraciət etmiş təşkilatların akkreditasiyası barədə qərarın qəbul etməsi üçün ayrılan müddət başa çatır.

APA-nın məlumatına görə, Seçki Məcəlləsinə əsasən aktiv seçki hüququna malik Azərbaycan vətəndaşı öz təşəbbüsü ilə, qeydə alınmış namizədin, siyasi partiyanın, siyasi partiyalar blokunun, seçkilər sahəsində fəaliyyət göstərən qeyri-hökumət təşkilatının təşəbbüsü əsasında, beynəlxalq (xarici) müşahidəçilər (qanunla müəyyənləşdirilmiş qaydada müvafiq dəvət əsasında Azərbaycana gəlib Mərkəzi Seçki Komissiyasında qeydiyyatdan keçməklə) seçkilərin elan edildiyi gündən başlayaraq seçkilərin keçirilməsi gününə 10 gün qalanadək Azərbaycanın bütün ərazisində müşahidə aparılmasına dair ərizələri MSK-ya təqdim etməlidirlər… Davamı →