Referendumla bağlı yaradılan təşəbbüs qruplarından 3-ü 40 min imza toplayaraq MSK-ya təhvil verib
Bakı. Elnur Məmmədli – APA. Martın 18-də keçiriləcək referendumda iştirak etmək üçün yaradılan təşəbbüs qruplarının 3-ü tələb olunan 40 min imzanı toplayıb. MSK-nın mətbuat xidmətindən APA-ya bildirilib ki, “Yeni Azərbaycan” təşviqat qrupu ilə yanaşı, “Tərəqqi” və “Abad kənd” təşəbbüs qrupları da imza vərəqələrini MSK-ya təhvil verib.
Qeyd edək ki, bu günə qədər 14 təşəbbüs qrupu MSK-dan imza vərəqələri götürüb. Konkret seçki dairələri üzrə təşviqat aparmaq üçün isə dairə seçki komissiyalarına 120 təşəbbüs qrupu müraciət edib ki, onların da 40-ı təşviqat qrupu kimi qeydə alınıb.
