Bu günə qədər aprelin 11-nə təyin edilmiş prezident seçkiləri ilə əlaqədar Mərkəzi Seçki Komissiyası (MSK) və dairə seçki komissiyaları tərəfindən akkreditə olunmuş yerli müşahidəçilərin sayı ilə bağlı son statistika açıqlanıb. MSK-nın Media və ictimai əlaqələr şöbəsindən APA-ya verilən məlumata görə, prezident seçkiləri ilə əlaqədar 57 min 373 yerli müşahidəçi akkreditə olunub.
Qeyd edək ki, prezident seçkiləri ilə əlaqədar ölkə üzrə müşahidə ilə bağlı MSK-ya sənədlərin təqdim edilməsi üçün ayrılan müddət aprelin 1-dək olan dövrü əhatə edib. Dairələr üzrə seçkilərin müşahidəsi ilə bağlı dairə seçki komissiyalarına sənədlərin təqdim edilməsi üçün ayrılan müddət isə aprelin 6-dək olan dövrü əhatə edir.
